Эвгүй явдал

Монгол доо л ноймор нэг гэгдэх " Торго " салонд захиалсан үндэсний загвартай улаан даашинзаа өмсөөд найзын хуримaнд явсан би гадаадын олон зочдын нүдийг хужирлаж, загвар хийц чамин тансаг байдлаараа нэгэн орой од болов оо.

Хуримын ширээ идээ ундаа элбэгтэй бөгөөд нийт арван нэр төрлийн хоол бас түүнчлэн хэдэн төрлийн уух зүйлстэй. Шувуун идэштэн би хуримын зоогоос тоншин хүртэж, балга балгаар цай уусаар гэдсэнд хуримтлагдсан шингэнээ гаргахаар угаалгын өрөөг дэд захирлын эхнэрийн хамт зорив. Тэнд харин хэрэг биш дэв.

Олонд магтагдаж, намайг гоёсон даашинз минь өвдөг шүргэсэн урттай, ардаа хагас цахилгаантай, бариу загварынх бөгөөд чөтгөр биеийг дэгжин чимсэн бурхан гоёл л доо. Гэвч тэр гоёлыг урласан урлаач бүсгүй тухайн даашинзыг амьд бодигальд зориулан урлаагүй нь доорхи зүйлээр батлагдаж намайг нэг сайн дэглэв.

Шингэнээ гадагшлуулах зорилготой угаалгын өрөө орсон би, яаж ч хичээгээд хормойгоо дээш сөхөж чадсангүй. Нэг л арга байгаа нь арын цахилгааныг доошлуулж, даашинзаа бүтэн тайлаад илүүдсэн шингэн ээ гаргах. Гэвч өмсөх дөө цахилгаанаа хүнээр татуулсан би тайлах даа ч бас хэн нэгнээс тусламж хүсэхээс өөр замгүй. Надтай ханьсаж угаалгын өрөө орсон захирлын эхнэрийг гуйхаас ичих дээ хурим тартал гүрийхээр шийдэж тэндээс гарлаа.

Хуримын арга хэмжээ дөрвөн цагийн турш үргэлжлэх хуваарьтай тул үлдсэн хоёр цагийг тэсэж өнгөрүүлнэ гэдэг амаргүй. Юмыг сайтар анзаардаг хүнд бол хэвлий хэсэг минь түнтийгээд хэдэн сартай жирэмсэн хүн шиг харагдана. Санаа зоволт, хүлээлт хоёр хэвлий хэсэг дээр бүжиглэж надаар даажигнана. Тэвчээр алдахын даваан дээр дахиад л угаалгын өрөөг зорив. Энэ удаад харин ганцаар явсан тул тэргэнцэртэй хүнд зориулсан тусгай өрөөнд ороод өнөө муу бариу хормойтойгоо ноцолдож өглөө, болдоггүй ээ. Цахилгаанаа доошлуулах гэж үзээд эгээтэй л мөрөө мулталсангүй. Ядаж томоос том толь тэнд өлгөөтэй бөгөөд түүнд тусах аргаа барсан өөрийнхөө харахаар инээд ч хүрэх шиг уур ч хүрэх шиг. Инээж, уурлах сэтгэлийн хөөрөл хэвлий хэсэгт хэт мэдрэгдэж, хэзээ хэзээгүй хагарч мэдэхээр. Даашинзны хормой үнэхээр бариу бөгөөд материалын хувьд сунах ямар ч боломжгүй. Ийм зүйлийг даашинз захиалах даа анзаарч шалгаагүй нь миний буруу юу эсвэл ийм зүйлийг бодолцолгүй оёдог Монголдоо нэртэй " Торго "-ийнхны буруу юу гэж өөрөөсөө асуувал, уурлаж аргаа барсан сэтгэл минь мэдээж " Торго " зүг хөмсөг зангидна.

Уур, арга аа аль алийг нь барсан би хэдэн минут ноцолдож, хэдэн оёо ханзалж байж арай гэж чинэрсэн давсаг аа суллахад амьдралын аз жаргал гэдэг нөхцөл байдлаасаа хамаарч өөр өөр зүйлд оршдог болохыг мэдэрсэн юм. Асуудлаа хүчээр зохицуулж чадсан би, өнөөх хормойгоо буулгах гэж бас л ганц хоёр оёо ханзлав, гэвч хэдэн оёо ханзлах нь тухайн үед юу ч биш санагдана.

Хэвлий тэнийж, сэтгэл уужирсан хойно " Торго "-т төлсөн чамгүй их мөнгөн дөө харуусах сэтгэл төрсөн сөн. Хаа нэгтээ ажил хэргээр олон улсын арга хэмжээнд оролцох үед Монгол гэдэг онцлог харуулсан, хийц чанар сайтай цайны ганц гоёлтой болохсон гэхдээ хоног хугацаатай эх орон доо очсон өнгөрсөн жилийн тэр өдрүүдэд " яаралтай " гэдэг нэрийн дор нэлээдгүй их мөнгө төлж хийлгэсэн юм.

Өнгөрсөн зургаан сарын хугацаанд жин нэмж биед өөрчлөлт орсон шинж тэмдэг огтхон ч үгүй болохоор анхнаасаа л миний даашинзыг асуудалтай урлаж дээ гэх гомдолт бодол сэтгэл ханамжийн баталгааг тээр доош чангаана.

Гоёлын болон өдөр тутмын даашинз оёдог оёдолчин хийгээд захиалах гэж байгаа бүсгүй та хамгийн түрүүнд хормой хотын дээш, доош гүйх чадварыг сайтар шалгах хэрэгтэйг битгий мартаарай. Эс бөгөөд энэ түүх хэнд ч давтагдаж мэдэх юм.