Cогоо шиг хэвээрээ

Юу юугүй төрөx нь гээд амаржих тасагт шилжүүлснээс хойш арваад хоног өнгөрсөн ч өнөөдрийн байдлаар төөрөгүй л байсаар, хэзээ төрөх ч тодорхойгүй.

Төрөх гэснээс би чинь цагтаа согоо шиг сайхан охидтой найзладаг байлаа. Хавийн залуус өнөө хэдийн маань араас гүйгээстэй, хааяа агаа нар ч бас зүгээр байлгахгүй өнөө хэдийг минь өдөөстэй. Харин одоо бүгдээрээ айлын эхнэр, алдрай бяцxан үрсийн ээж нар болоод завгүй ч жаргалтай амьдарч явна. Харин тэд минь төрсөнийхөө дараа бүгд жин нэмээд хуучны үеэсээ арай өөрчлөгдсөн, зарим нэг нь өөрчлөлтөндөө жаахан дургүй.

Гэтэл энэ Хятад, Солонгос, Сингапур бүсгүйчүүд чинь төрлөө, турлаа л юмаа. Төрөхөөсөө өмнө ч согоо шиг, төрсөнийхөө дараа ч согоо шиг.  Би бүр гайхаад юу идэв, юу уув гээд уулзах бүрдээ л өнөө хэдийгээ байцаагаастай. Хэмжээний хувьд идэж уух нь их юмаа харин иддэг нэр төрлийн хоол нь л манай Монгол бүсгүйчүүдийнхээс их өөр юм. Би тэдэнд төрсөн эмэгтэйчүүдэд шинэ хонины шөл, хийцтэй цай, гурилан боов гээд л тамир тэнхээ сайжруулах болоод хөхөнд нь сүү оруулах бүх л төрлийн тэжээллэг хоолны талаар хэлэхэд өнөө хэдийн гайхаж, нүд амаа гурвалжлуулж, дөрвөлжлүүлж байгаа гэж жигтэйхэн. 

Охиноо төрүүлсэнээс нь хойш нэг сарын дараа Сисилия хэмээх Сингапур бүсгүйтэй уулзахад хачин гоё тураад төрсөн бүсгүй гэж хэлэхээргүй харагдаж байсан сан. Хоёр дахь хүү нь нэг ой хүрч яваа Солонгос бүсгүй Сү-Ёон ч гэсэн хоёр дэрсxэн хүүгийн ээж гэж хэлэхээргүй гуалиг бүсгүй, ер нь түүнийг бүсгүй гэхээсээ охин ( girl ) л гэж дуудвал зохилтой санагддаг юм. Доод айлын маань хөрш Хятад бүсгүй таван сартай хөөрхөн охинтой ч өөрийнх нь бие хаа гэдэг хачин гуалиг, секси нөхөр. Энэ мэтээр бичээд байвал төрсөн гуалиг бүсгүйчүүдийн бүхэл бүтэн холбоо үүсгэж болохоор урт дараалал бичигдэж мэднэ.

За тэгээд энэ бүсгүйчүүд чинь яг л манай бүсгүйчүүд шиг төрөөд, гам дэглэм ээ бариад явдаг юм билээ. Гэхдээ харин идэж уух хоол унд нь л таргалуулах бус тамир тэнхээ сайжруулахад зориулагдсан өөх тос агуулаагүй, (агуулсан байсан ч энэ хэд чинь хамаж шимээд тосыг нь хаячихна ) олон төрлийн ургамлаар баялаг шөлтэй голдуу хоол иддэг юм гэнэ. 

Энэ зурагт харагдаж байгаа зүйл ядаргаагаа тайлж, биеийн эрч сайжруулах зориулалттай ургамлын шөлний орц бөгөөд ихэвчлэн тахианы махтай хольж шөл хийгээд махыг нь хаяж шөлийг нь уух нь элбэг. Төрсөн эмэгтэйчүүдэд энэ мэт ургамлын гаралтай шөлийг олон төрлөөр нь хийж өгөх бөгөөд бүгд ямар нэгэн байдлаар өөх тос агуулаагүй байдаг нь тэдэнд илүү жин нэмэхгүйгээр биеийн тэнхээгээ сайжруулах хамгийн сайн тэжээл болдог аж.

Ийм шөлнөөс гадна " Шувууны үүр " ( Birds nest ) гэх энэ зүйлийг нэгэн төрлийн ургамалтай нийлүүлэн жигнэж буцалгаад зөгийн балтай хольж төрсөн эмэгтэйчүүдээс гадна ядарсан, хагалгаанд орсон эсвэл өндөр настай хүмүүст уулгах сайн байдаг гэнэ. Сволов ( Swallow ) гэх шувууны барьдаг энэхүү үүр нь тийм ч хямд биш бөгөөд дooр зурагт харагдаж байгаа 250гр-ийн савалгаатай нь 600 Сингапур доллар буюу Монгол төгрөгөөр 600 гаруй мянган төгрөг. Өөх тос агуулаагүй болохоор шувууны үүр гэдэг энэ өтгөн ундаа нь бас л таргалуулна гэсэн сөрөг тал үгүй.

Энэ мэтээр идэж уухдаа хүртэл эрүүл мэнд, гоо сайхандаа сөргөөр бус эерэгээр нөлөөлөх эмчилгээний голдуу хоол идэхээр энэ бүсгүйчүүд чинь гоё сайхан байхгүй гээд ч  яахав дээ гэж бодогдох.

Үүнээс гадна миний анзаарч, үнэн байх гэж боддог өөр нэгэн зүйл байна. Тэр юу гэвэл...

Манай Монголчуудын ихэнх нь сэрвээгээрээ жаахан бөгтөр, ялимгүй урагшаа дугуйрсан мэт унжуу мөртэй харагдаад байдаг, гэтэл энэ Синга нар чинь эр эмгүй тэнийсэн нуруу, тэвхийсэн мөр. Мөрнөөс гадна эр эмгүй хөл гэж хачин тэгшхэн байх нь элбэг. Ер нь Сингапурын гудамжинд дугуйрсан хөлтэй эмэгтэйг олж харах нь ховор. Харин манайд бол эсрэгээрээ гэвэл нэг их хилсдэхгүй байх.

Би бодох доо, манай Монголчуудын биеийн тэр нийтлэг онцлог нь нярай хүүхдийг хэдэн давхар өлгий даавуугаар чивчиртэл өлгийддөг заншлаас үүдэлтэй болов уу гэж боддог юм. Синга нарын хувьд тэр хар халуунд хүүхэд өлгийднө гэсэн ойлголт үгүй болохоор төрсөн цагаасаа эхлээд баглуулж, хүлүүлэхгүй биед эвтэй нимгэн сул хувцас өмсөөд эхэлчихдэг болохоор нярайн мөгөөрс яс болон хатуужихдаа хэлбэрээ зөв олж чаддаг байх даа гэж санана.

Танил Монгол охины бие гэж ванлий, түүнийг төрсний дараа долоо хоног л өлгийдөж, тэрнээс хойш байнга нярайн хувцас өмсгөдөг байсаан гэж ээж нь ярьж байсан юм. Тийм болохоор би миний таамаг үнэн байж магадгүй ээ гэж итгэх дээ, цаг нь болоод маамуутай болохоороо өлгийдөж манцуйлахгүй өсгөнө гэж боддог юм. Өөрийн бодлын үнэн эсэхийг үр хүүхэд минь нас биед хүрэхэд л мэддэг байх даа, тэр болтол ч өдий л байна даа.

Юу юугүй төрөx нь гээд амаржих тасагт шилжүүлснээс хойш арваад хоног өнгөрсөн ч өнөөдрийн байдлаар төөрөгүй л байсаар, хэзээ төрөх нь ч тодорхойгүй энэ дөрвөн нөхөр.ккк