Дахиад л бороо сэрүү татуулан шивэрч сэтгэлд хөг нэмэх мэт шувууд дуулалдан жиргээд байгалийн чимээнд бүсгүй бодолд автан сууна.
... Холдоод одсон чиний тухай би хэдийн бодохоо больсон. Сэтгэл минь яг л чамайг хайрлаж байсан шигээр хэн нэгнийг хайрлаагүй ч, хааяа нэг, хэн нэгэн сайхан залууд сэмхэн дурлаж догдолсоор л яваа. Сэтгэл минь хэн нэгэнд татагдаж, нууцxан би дурлаж эхлэхдээ хэнээс ч айж ичихгүй эрх чөлөөтэй байгаадаа баярлаж, чамд талархдаг.
Энэ эрх чөлөөг чиний алхаж одсон тэр харгуй дээрээс би олж авсансан. Олон ч жил бие биедээ үнэнчээр бид нөхөрлөж яваа. Гэхдээ энэ эрх чөлөөг би буруу утгаар тунхаглан зарлаагүй, эрх чөлөөг чиний надад хамгийн сүүлд бэлэглэсэн эрхэм бэлэг мэт санахдаа хүндэтгэж явна.
Минийх байхаа больсон чиний тухай хэдийн би дурсахаа больсон, гэвч зүүд нойронд дураараа ирж, уйлан хайлан явах дүрд чинь ховсдуулахдаа нэг л мэдэхэд бодол болон чамайг би саначих юм. Тэгж би санахдаа жаргалтай болох мэт инээмсэглэн байна, одоо хүртэл инээд бэлэглэх чи сэтгэлд минь ийм ойр байсаар л байгаа гэж үү...
Зүрхний түлхүүр чиний гарт эсвэл сэтгэлд чинь өлгөгдсөн болохоор өөр хэн нэгэн тэр хаалгаар бүтэн орж чаддаггүй, сэмхэн завсраар нь харчихаад л явчихдаг байх. Уг нь би сэтгэлийнхээ үүдийг бүтэн нээж, цоож цуургаггүй болсон гэж боддог байсан юм, эндүү л бодсон бололтой.
Амьдралын замаар хоёр тийшээ хэн хэндээ жаргал хүсээд хэдийн бид салсан ч, тайлж мэдэмгүй шөнийн зүүдэнд шөнө бүр чамд тэврүүлж, гарт чинь хөтлүүлэн алхлаа. Хэнээс ч сонсоогүй дурлалын үгсийг хачин гоёоор надад зориулан шивнэчихээд нарны гэрлээс зугатах мэт дүр чинь бүдгэрсээр чи явж, би сэрдэг. Дахиад л зүүдэллээ гэж бодсоор чамайг хормын төдий санахдаа харц нь жаахан гунигтай байв уу гэж сэтгэл жаахан шимширдэг ч гуниг зохихгүй нүдтэй гэж бодлоосоо чамайг өмөөрч би тэрсэлддэг.
Зүрхэнд чинь миний гэх бяцxан орон зай байсаар байгаа гэж үү, итгэл муутай ч бас огт үгүйсгэж чадахгүй нь. Ердөө л энэ таамаг хэдий ч тийм байх нь нэг талаар сайхан харин нөгөө талаар... Чимээгүй л байя.
Дэргэд чинь байхад харахгүй тэгсэн атлаа хайртай гээд уйлаад хайх дүртэй чинь зүүдэндээ би олон таарлаа. Эсвэл юу ч хэлэхгүй тэврээд л зогсох чиний энгэрт нүдээ анин зогсохдоо энэ чинь зүүд гэж бодоод итгэл муутай зогсох өөрийнхөө дүрийг даанч олон харсан.
Чиний зүрхэнд би ойр байна уу, миний зүрхэнд чи ойр байна уу, эсвэл бид бие биеийнхээ зүрхэнд одоог хүртэл ийм ойр байсаар л байна уу...
... Бороо зогсож, шувууд дуулалдан жиргэх чимээ алдарч машин тэрэгний хүчит хөдөлгүүр болоод хурдан галт тэрэгний хүнгэнэх дуу тэртээд сонсогдоно, бүсгүй энэ шөнө юу ч зүүдлэхгүй тайван унтахыг л хүснэ. Харин зүрх нь юу хүсээ бол зөрүүд дээ зөрүүд..
Нийтэлсэн: erhtsas 2009-04-29 12:40:19
2025 он 8 сарын 30
Олон жилийн өмнө энэ мэтээр бичиж өгдөг байж. Энэ бичлэгийн эзэнтэй одоог хүртэл уулзаагүй. Гэхдээ тэр нэг хүүгийн аав, би хоёр хүүгийн ээж болоод аль аль маань сайн, сайхан ханьтай болоод жаргаж яваа.
Хуучны бичлэгүүдээ унших сонирхолтой байна. Зарим үйл явдлыг хэрхэн өрнөж явааг үргэлжлүүлж бичихээр ч зүйлс олон байгаа юм бна :)
No comments:
Post a Comment